На синоќешното доделување на наградите „Тони“ новата сценска адаптација на мјузиклот „Мулен Руж“ победи во 10 категории на престижните театарски награди „Тони“.

По едногодишна пауза заради пандемијата, синоќа во Њујорк се одржа четиричасовната церемонија што ја слави американската театарска индустрија.

Преставата „Мулен Руж! Мјузикл“ освои награди за сценографија (сценски дизајн), костими, осветлување, дизајн на звук, додека Дени Бурстајн ја освои наградата за најдобар спореден актер . Соња Таје ја освои наградата за кореографија во своето деби на Бродвеј, а Алек Тимберс го освои трофејот за најдобра музичка режија.

„Поминаа повеќе од една година, но наградите „Тони“ се тука, пееше ѕвездата на „Хамилтон“ Лесли Одом, отворајќи специјална телевизиска емисија со наслов „Бродвеј се врати“, во која се појавија ѕвезди како Џон Леџенд, Џејк Гиленхол и други.

Копродуцентката на мјузиклот „Мулен Руж!“ , Кармен Павловиќ рече дека секоја представа заслужила награда по овие тешки 18 месеци.

„Наследство“ („The Inheritance“), портретот на животот на хомосексуалците во 21 век е прогласена за најдобра претстава и освои уште две награди „Тони“ а драматургот Метју Лопез кој е со португалско потекло на присутните им упати апел.

„Ова е 74. издание на наградите „Тони“ а јас сум првиот латино писател кој победи во оваа категорија. Ова мора да се смени. Ние сме енергична заедница, имаме толку приказни да раскажеме. Тие се во нас, сакаат да излезат надвор“, рече Лопез.

„Војничка игра “ („Soldier’s Play“), претсавата за убиството на афроамерикански војник во американската воена база во 1944 година, ја освои наградата за најдобра повторна изведба.

Сепак, разочарувањето стигна за „Игра на робови“ („Slave Play“), провокативна представа за расите и сексуалноста, која на церемонијата влезе со водечки 12 номинации, но не освои ниту една.

Невладиното, антирасистичко здружение „Broadway Advocacy Coalition“, кое се бори за зголемување на различностите во театарот, доби почесна награда.

„Божиќна приказна“ („A Christmas Carol“), сценската адаптација на романот на Чарлс Дикенс, освои пет награди, а Ејдрен Ворен ја освои наградата за најдобра актерка во улогата на Тина Тарнер во мјузиклот „Tina – The Tina Turner Musical“.

Ниту една претстава номинирана за наградите „Тони“ моментно не се игра на Бродвеј, ниту пак ќе се врати таму.

(А.В)