Џон Тери (36) ја продолжува кариерата во Астон Вила. Трансферот, според англиските медиуми, ќе биде реализиран денеска и веднаш ќе се стави на располагање на стручниот штаб на подготовките на екипата за наредната сезона во Чемпионшип дивизијата. Со тимот од Бирмингам, кој патем е поранешен европски првак, ќе потпише договор на една година вреден 3,5 милиони евра.
Репрезентативниот стопер на Гордиот Албион се раздели со Челзи на крајот на сезоната по 19 години минати меѓу „сините“ од „Стемфорд бриџ“. Од причина што не сакаше да игра против својот, сега веќе, поранешен клуб, тој ги одби понудите на Стоук, на Свонси и на ВБА кои беа силно загреани за неговите услуги, а не сакаше ниту во странство, конкретно во Галатасарај, кој исто така испрати понуда.
Тери беше член на сениорскиот тим на Челзи од 1998 година. Во 2000 година беше испратен на позајмица во тимот на Нотингем Форест за кој настапи во само шест средби. По враќањето кај „сините“ одигра 492 меча во кои постигна 41 гол. Има шест и за репрезентацијата на Англија во 78 средби и еден за младата селекција во девет меча.