Допингот да биде третиран како кривично дело е планот на официјална Кина во пресрет на Зимските олимписки игри (ЗОИ) во Пекинг во 2022 година, а спортските грешници што ќе паднат на тестови да завршат зад решетки.
Најмногубројната држава во светот во текот на 80-те години од минатиот век важеше за средина во која допингот не е непознат. Ситуацијата кулминира во последните две декади во кои траги од недозволени средства се лоцираа во примероци и кај нејзините најдобри спортисти, пред се кревачи на товар и пливачи. Дилемите се дали тоа се прави со знаење на државата или на своја рака.
Затоа пред ЗОИ 2022, Кинезите сакаат да се исчистат од имиџот на допингирана земја за што планираат да воведат и брутални мерки. Намерата е израмнување на допингот со дрогата, па престапниците ќе се соочат со обвинение за кривично дело и над нив ќе „висат“ решетки.
„Наша цел е да покажеме на светот дека сме сериозни и одлучни во борбата со допингот и дека сме подготвени на конкретна акција“, изјави Гоу Жонгвен, претседател на спортската администрација на Кина.
Според него, најавените мерки ќе стапат во сила од 1 јануари во 2019 година за постигнување на целта до 2022 година, но и дотогаш на сите меѓународни натпреварувања на кои Кина ќе има свои репрезенти.