Кривичниот суд го одби барањето на Специјалното јавно обвинителство за притвор за бизнисменот и сопственик на телевизијата „Нова“ (која не е поврзана со порталот НОВАТВ) Сеад Кочан, кој е осомничен во случајот на СЈО под кодно име „Труст“.
„Постапувајќи по предлози на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО), пред судии на претходна постапка при Основниот суд Скопје 1 – Скопје вчера беа повикани двете лица, за кои се однесуваат предлозите за определување мерка притвор, да се произнесат во однос на предлозите во присуство на Јавен обвинител од СЈО и овластен правен застапник. Во однос на лицето С.К. по разгледување и ценење на фактите и доказите приложени во предлогот за определување мерка притвор, судијата на претходна постапка донесе решение со кое го одби предлогот на СЈО“, пишува во соопштението на судот.
За Василие Авировиќ, Специјалното јавно обвинителство го преиначило барањето и наместо притвор побарало забрана за учество на тендер и забрана за контактирање со одредени лица. Ова барање на СЈО е уважено од судијата на претходна постапка во Кривичниот суд.
Од Специјалното јавно обвинителство велат дека ќе се жалат на одлуката на судот да не му одреди мерка притвор на Кочан.
„Ќе се жалиме на оваа одлука на судот бидејќи сметаме дека 17 милиони евра се доволна причина за да се дозволи обезбедување мерки за осомниченото лице“, велат од СЈО за НОВА.
СЈО има право да се жали во рок од 24 часа до Кривичниот совет на Судот, кој пак има 48 часа рок да одлучи дали ќе ја прифати жалбата на обвинителството.
Кочан и Авировиќ се осомничени за фалсификувале документи со кои добиле тендер од 17 милиони и 200 илјади евра од ЕЛЕМ за ископ на јаглен и јаловина од рудникот Суводол. Овие три фирми на тендерот настапиле како конзорциум, а главен носител била „Трансмет“.