Фудбалерите на Шкендија им фрлија нова ракавица на колегите од Вардар. Тетовските „црвено-црните“ го совладаа Скопје со 4:0 и повторно пренесоа притисок врз шампионот дека нема право на кикс вечерва (18 ч.) на „Телеком арена“ против Пелистер во последниот меч од 16. коло во фудбалското првенство на Македонија.
Три од четирите гола под Шара попладнево реализира капитенот на тетовци, Ферхан Хасани. Серијата на погодоци ја отвори во 11 минута, ја продолжи во 38. и ја затвори во 60. како печат на 13. триумф во сезоната со кој Шкендија стигна до бројката од 40 освоени бода од можни 48 досега. Во меѓувреме, во 53 минута, меѓу стрелците се впиша и Егзон Бејтулаи.
Победник немаше во дербито според позициите на табелата. Академија Пандев и Работнички одиграа 1:1 пришто гостите од Скопје успеаја до бод во Струмица во четвртата минута од судиското продолжение. Сержињо беше стрелец на погодокот за избегнување на пораз на стадионот „Младост“. Водство на домашните обезбеди Балдовалиев во 52 минута.
Силекс беше единствениот состав што освои три бода на гости попладнево. Кратовци триумфираа против Победа во Могила со 2:0 со головите на Тимов во 20 минута и на Ѓорѓевиќ во 65.
Сигурен настап пред своите гледачи и на екипата на Шкупи која ја порази Ренова со 4:1. Двоен стрелец за чаирчани беше Јашароски во 20 минута и во 59., Стојкоски во 13. и Адем во 71.
Прва лига, 16 коло
Резултати
Шкендија – Скопје 4:0
Академија Пандев – Работнички 1:1
Победа – Силекс 0:2
Шкупи – Ренова 4:1
Вардар – Пелистер (18 ч.)
Табела: Шкендија 40, Академија Пандев 27 (-1), Вардар 26 (-3), Силекс 25, Работнички 19 (-1), Шкупи 18 (-1), Ренова 17, Пелистер 15 (-1), Победа 15, Скопје 9 (-1).