Задолжителното приложување сертификат за примена најмалку една доза вакцина што е потребен за влез во многу места и присуство на разни настани, го зголеми процентот на вакцинирани. До завчера се ревакцинирани речиси пола милион граѓани. Паралелно со вакцинацијата, се зголемува и бројот на новозаразени, кој веќе два дена е по 1.000 лица на ден. Расте бројот и на починати како компликација од вирусот. Министерството за здравство вчера соопшти дека во претходното деноноќие се регистрирани 15 починати лица.
Сертификат за примена најмалку една вакцина против ковид-19 или доказ дека болеста е прележана пред 45 дена, од вчера се потребни за влез во кафуле, обложувалница, трговски молови, казина, културни настани и секаков вид прослави. Мерките се дозирани со цел да се зголеми опфатот за вакцинација и да се спречи ширењето на вирусот, истакна вчера министерот за здравство Венко Филипче.
Десеттина проценти од сите кои се дијагностицираат во текот на денот, како што рече, се вакцинирани. Исто така, десеттина проценти од хоспитализираните се вакцинирани.
Тоа што охрабрува е дека од вкупната бројка на вакцинирани која во текот на вчерашниот ден достигна 600.000 малку се дијагностицирани. Бројката се мери во промили 0,002, што значи дека главен проблем е во бројот на граѓани кои не се вакцинирани. Воопшто немаме проблем со тие кои се вакцинирани, и во другите земји заболуваат, меѓутоа за 20 пати е помал ризикот од смртен исход ако заболи некој кој е вакцинира, рече Филипче.
Тој посочи дека во градовите каде има повисок опфат со вакцинација од близу 50 проценти засега нема притисок во болниците како што се Битола, Охрид и Штип. Потенцира дека здравствениот систем е целосно подготвен за новиот ковид-бран.
Од 50-тина случаи на кои е направен скрининг во изминатите денови, две третини отпаѓаат на делта сојот, а една третина на британскиот сој што значи дека овој сој е подоминантен и следиме како се одвива епидемиолошката крива, рече Филипче.
Премиерот Зоран Заев, пак, вчера изјави дека мерките се предложени од најстручните луѓе во државата.
Согласно мерките, како што беше јавно, јасно и прецизно објавено, за учество во колективен настан, културен настан, симпозиум, семинар, угостителски објект или кој било објект или субјект каде има повеќе од 30 присутни мора да се има потврда за примена вакцина. Мерката е исто така потврдена и за другите објекти, субјекти и настани дека мора да се има потврда за примена вакцина со тоа што објектите над 30 луѓе капацитет, мора да определат редари. Тие што имаат под 30 капацитет, самите вработени тоа го организираат или одговорни за настанот или во самиот угостителски објект, појасни Заев.
Од 1 септември за сите туристи домашни и странски, посочи премиерот, ќе важи обврската за ПЦР тест или задолжителна потврда за прележана зараза, за сите што излегуваат и влегуваат во државата.
И покрај зголемувањето на бројот на заразени и починати од Ковид-19, премиерот Заев изјави дека не се размислува да се одложи стартот на пописот на населението, домаќинствата и становите, кој ќе се спроведе од 5 до 30 септември.
Заклучно со завчера вакцинирани се вкупно 612.391 граѓани. Министерството за здравство информира дека во текот на завчерашниот ден е забележан значително зголемен интерес за вакцинација.
Според информациите од Министерството, завчера прва доза вакцина примиле 11.732 граѓани, а вкупно се вакцинирале 17.427.
Вакцините се безбедни и ефикасни и се единствениот начин да се победи пандемијата. Само со комплетна вакцинација се спречува тешка форма на болеста, се намалува шансата од заболување, како и смртен исход од истата, се вели во соопштението од МЗ.
Досега, во државата вкупно се аплицирани 1.097.855 дози вакцини, а ревакцинирани се 485 464 граѓани.