Одлични 1:1 има Вардар против Малме по првиот меч од второто квалификациско коло за Лигата на шампиони на УЕФА. Одлично затоа што се остварени на гости, одлични затоа што реваншот се игра во Струмица и одлични затоа што се плод на добра и зрела игра во натпревар во кој „црвено-црните“ знаеја што сакаат и знаеја како до посакуваното. Поведоа со погодокот на Бобан Николов во 63 минута, домашните израмнија во 75. преку стоперот Брорсон и до крај резултатот остана непроменет.
Вардарци во најголем дел од натпреварот беа рамноправен партнер на шведскиот првак, на периоди и подобар ривал на „Сведбанк арена“ и заслужено се враќаат непоразени од европскиот север, но, според приликите, може и да жалат што не ги добија воведните 90 минути од двомечот.
Македонскиот шампион имаше две одлични прилики за гол во првото полувреме за разлика од фудбалерите на Магнс Першон кои воглавно се закануваа од дистанца. Балотели, по асистенција на Спировски, во 17 минута се најде во идеална позиција да го отвори резултатот, но неговиот удар за малку заврши во гол-аут. Бразилецот се најде во гол ситуација и по 17 минути. Овојпат дочека отпадок по ударот на Барсегјан и блокот на Нилсен, но Виланд одново имаше среќа.
Седлоски во паузата го повлече првиот потег од клупата. На терен го испрати Никола Глигоров на место Бесар Исени. Замената требаше да донесе освежување во средниот ред како поддршка во офанзива и во потрагата по гол. „Црвено-црните“ беа трпеливи, чекаа и дочекаа. Се играше средината на второто полувреме, поточно 63 минута, кога вардаровата клупа влезе во еуфорија, а трибините во молк. Спротивниот амбиент на „Сведбанк арена“ го продуцира Николов чиј удар од стативата заврши во целта.
Малме набрзо успеа да ја поништи негативата. Швеѓаните израмнија по прекин во 75 минута кога Брорсон од непосредна близина ја спроведе топката зад грбот на Гачевски. До крајот, вардарци ориентирани на одбрана на резултатот, Малме ја презеде иницијативата во обид со каква-таква предност да истрча на „Младост“, но обидите на Нилсен во 86 минута и на Кристијансен во 79. и во третата од судиското продолжение (ја погоди стативата) не донесоа пресврт.
Малме – Вардар 1:1 (0:0)
Стадион: „Сведбанк“ арена во Малме. Гледачи: 15.000. Гл. судија: Торвалдур Арнасон. Асистенти: Јохан Гудмундсон и Гилфи Мар Сигурдсон (сите тројца од Исланд). Ж. картони: Цибицки (Малме); Грнчаров, Барсегјан, Николов, Фелипе, Гачевски (Вардар). Стрелци: Брорсон 75′ за Малме; Николов 63′ за Вардар.
Малме (формација 4-4-2): Виланд – Конате (Еикрем 65′), Брорсон, Нилсен, Тинерхолм – Јотун, Левицки, Кристијансен, Ракип (Сванберг 65′) – Цибицки (Бергквист 85′), Бергет. Тренер: Магнус Першон.
Вардар (формација 4-1-4-1): Гачевски – Демири, Новак, Грнчаров, Хамбарѕумјан – Спировски (Којашевиќ 78′) – Николов, Исени (Глигоров 46′), Фелипе, Барсегјан (Блажевски 72′) – Балотели. Тренер: Гоце Седлоски.