Триесетиседумгодишниот Данец, кој е осомничен за нападот со лак и стрела во Конгсберг, преминал во ислам, а полицијата пред синоќешните убиства беше во контакт со него поради загриженост за радикализација, изјави денеска шефот на норвешката полиција Оле Бредруп Саверуд, пренесе „Си-Ен-Ен“.

Данецот (37) беше уапсен синоќа за нападот во супермаркет во норвешкиот град Конгсберг, во кој уби пет лица, а двајца тешко повреди. Откако полицијата добила пријава за нападот, го привела осомничениот за точно 34 минути. Очевидци велат дека побеснетиот човек убил пет лица, додека другите панично трчале по улиците, обидувајќи се да избегаат од заканата.

Тој во моментот е во притвор, а полицијата претходно соопшти дека е во тек истрага за да се утврди дали нападот може да го третира како терористички акт.

Жена, која во моментот на нападот била на улица во Конгсберг, за локалната телевизија изјави дека маж одеднаш се појавил на аголот од улицата со лак и стрела во рацете.

Слушнав метеж и видов жена како се крие на аголот, потоа се појави маж и застана на аголот на улицата со лак и стрели во некаква торбичка. Потоа видов како луѓето трчаат по улицата, исплашени за сопствениот живот. Една од нив беше жена со мало дете во рацете, рече локален жител кој сакаше да остане анонимен.

Нападот се случи во последниот ден од мандатот на конзервативната влада на чело со Ерна Солберг. Премиерката во заминување рече дека информациите што ги добила за инцидентот се „страшни“.

„Разбирам дека многу луѓе се плашат, но важно е да се нагласи дека полицијата сега ја контролира ситуацијата“, рече таа на прес -конференција, неколку часа пред официјално да ја напушти функцијата премиер на Норвешка.