Норвешкиот шаховски велемајстор Магнус Карлсен вечерва во Дубаи ја одбрани титулата светски првак, совладувајќи го предизвикувачот Јан Непомњашчиј со вкупен резултат 7,5:3,5 и со тоа ја постигна една од најубедливите победи во поновата историја на древната игра.
Од 1948 година кога Меѓународната шаховска федерација (ФИДЕ) го презеде под свој патронат Поединечното светско првенство, само два дуела завршија со пет поени разлика (во Москва 1961 година: Ботвиник – Таљ 13:8 и во Лондон 1993 година: Каспаров – Шорт 12,5:7,5, а четири пресметки завршија со четири бода разлика (во Москва 1960 година: Таљ – Ботвиник 12,5:8,5, во Рејкјавик 1972 година: Фишер – Спаски 12,5:8,5; во Мерано 1981 година: Карпов – Корчној 11:7 и во Холандија и Инденозија 1993 година: Карпов – Тиман 12,5:8,5).
Сепак, Карлсен ја одбрани титулата по само 11 партии со што триумфот на Норвежанецот е најбрз во историјата на шахот.
Убедливата победа, сепак, не говори само за одличната игра на Карлсен, туку и за слабостите на неговиот предизвикувач кој понекогаш на двобојот во Дубаи правеше и почетнички грешки. Таков беше случајот и во денешната, последна, 11 партија, кога во приближно изедначена позиција, Непомњашчиј направи „харикири“, ослабувајќи ја позицијата на својата рокада, по што Карлсен со жртва на квалитет го „соголи“ противничкиот крал и во незапирлив напад со освојување дама постигна решавачка предност.