Државното обвинителство во Норвешка денеска побара неонацистотот Андерс Бехринг Брејвик да биде задржан во затвор, истакнувајќи дека е исто толку опасен, колку и во 2011 година кога уби 77 лица.
Брејвик (42), кој тврди дека се одрекол од насилство, побара условно ослободување. Пред десет години тој беше осуден на казна затвор од 21 година, која може да се зголеми ако се процени дека тој е опасен за околината.
Брејвик е истиот злосторник кој ги повикуваше кај себе младите во Утоја, кои му поверуваа дека ќе им помогне, а тогаш пукаше во нив, кажа главната обвинителка Хулда Карлсдотир во судот во Телемарк.
Денеска заврши последниот ден од сослушувањето, кое од безбедносни причини се премести во спортската сала на затворот во Скиен, на југот од земјата, каде Брејвик ја отслужува казната.
На 22 јули 2011 година, десничарскиот екстремист прво активира бомба близу зградата на Владата во Осло и притоа уби осум лица. Потоа уби уште 69 лица, најголем дел од нив млади, пукајќи од огнено оружје во летниот камп за млади на островот Утоја.
Брејвик неделава изјави дека се одрекол од насилство. И понатаму ќе се залага за неонацистичките идеи, но, како што рече, на мирен начин.
Во манифестот што го објави пред нападите во 2011 година, Брејвик јавно призна дека ќе го искористи судењето како платформа за ширење на својата идеологија.
Пред тројцата судии тој упати нацистички поздрав, мафташе со пораки испишани на хартија и држеше долги идеолошки тиради.
Казната му беше изречена во 2012 година по што влезе во период од најмалку десет години затвор пред да може да побара условно ослободување, што беше максимум во тоа време.
Барањето на Брејвик, кој психијатарот и затворските власти го оценуваат како подеднакво опасен, како и во моментот на нападот, беше априори осудено на неуспех, пренесуваат француски медиуми.