Нов Зеланд одобри употреба на вакцината на „Фајзер“ и „БајонТек“ за деца и адолесценти со цел да се сузбие ширењето на коронавирусот, соопшти денеска премиерката на таа земја Џасинда Ардерн.
Нов Зеланд од денеска е во строго „затворање“, откако беше идентификуван еден случај на локална трансмисија на вирусот, прв по речиси шест месеци. Кластерот во Окленд сега има 21 случај на инфекција, од кои 11 нови случаи се регистрирани во изминатото деноноќие..
Ардерн рече дека децата на возраст од 12 до 15 години ќе можат да ја примат вакцината против коронавирус на „Фајзер“ и „БајонТек“.
Безбедно и добро е да се направи тоа, рече Ардерн.
Претходно, вакцината беше одобрена за луѓе на возраст од 16 години и постари. Обезбедени се две дози со интервал од шест недели.
Со население од пет милиони луѓе, Нов Зеланд ќе остане во строго затворање барем до сабота. Земјата досега имаше околу 2.580 случаи на ковид-19 и 26 смртни случаи.