Нова лидерска средба за нов датум на избори, ако во таа насока бидат и стручните анализи и препораки на Комисијата за заразни болести и здравствените власти поради пандемијата на ковид-19. Премиерот Оливер Спасовски вели дека избори ќе има и неопходно е да се одржат што поскоро, дел од членовите на Владата деновиве истакнаа став дека „избори треба да има што ситуацијата со коронавирус го дозволи тоа“. Лидерот на ВМРО-ДПМНЕ, Христијан Мицкоски, пак, во една прилика посочи дека „средината на јули би бил идеален момент“ за изразување на волјата на граѓаните, иако, како што вели, „приоритет е здравјето на граѓаните во овој момент“. Но, дали ќе има начелен договор или и конкретен датум, ќе биде познато во вторник по средбата кај претседателот Стево Пендаровски.

Премиерот Оливер Спасовски, вчера соопшти дека одлуката за избори, пред сè, ќе се базира на интересите на државата и на граѓаните, притоа оставајќи ги на страна сите политички интереси и ќе биде детерминирана од развојот на здравствената криза. Тој очекува на лидерската средба да се постигне договор во однос на одржувањето на изборите. Според него, изборите е неопходно да се одржат што е можно поскоро.

„Не знам дали е идеално време јуни за да се одржат парламентарните избори, но заради најавите дека е можно да се врати оваа криза уште еднаш после септември, мислам дека е неопходно да се одржат што е можно побрзо, имајќи предвид дека на државата и се потребни функционални институции што ќе можат да носат одлуки за сите прашања кои се во интерес на граѓаните“, посочи Спасовски.

Министерот за здравство Венко Филипче, пак, вели дека во однос на изборите ќе останат внимателни за тоа што ќе препорачаат здравствените експерти следната недела. Препораката ќе се темели врз основа на бројките на пациентите и анализа на случаите.

За лидерот на СДСМ Зоран Заев нема да има посоодветен период за избори од јуни годинава. Сепак, услов е кризата со коронавирусот да биде целосно одмината. Изборите, според него, треба да се одржат поскоро и поради фактот што немаме Парламент, и имаме техничка Влада, а не политичка.

ВМРО-ДПМНЕ, пак, останува на ставот дека во моментот изборите не се прв приоритет на партијата. Најважно е здравјето на граѓаните. Лидерот на партијата Христијан Мицкоски рече дека ќе излезат со коментар по самата лидерска средба откако ќе ги воочат проценките на Советот за безбедност и каков ќе биде ставот на претседателот Стево Пендаровски.
На лидерската средба кај шефот на државата во вторник поканети се лидерите на СДСМ, на ВМРО-ДПМНЕ, на ДУИ, на ДПА, на БЕСА и на Алијансата на Албанците. Поканет е и претседателот на Собранието, Талат Џафери, кој смета дека по завршувањето на вонредната состојба треба да продолжат изборните активности каде што застанаа, а ДИК веднаш да почне со подготовка на процесот.