Лионел Меси останува без трофеј со репрезентацијата на Аргентина. Бразил ја доби најновата јужноамериканска фудбалска класика и ги совлада „гаучосите“ со 2:0 во полуфиналето на Копа Америка и се најави на „Маракана“ во мечот за титулата со подобриот од дуелот меѓу Чиле и Перу.
Двата гола беа дела на Габриел Жезус и на Роберто Фирмињо. Првиот го потпиша играчот на Манчестер сити во 19. минута во кој најголема улога, сепак, имаше Дани Алвеш, вториот го постигна фудбалерот на Ливерпул во 71. минута.
Аргентинците не беа без шанси, двапати ги погодуваа рамките на голот на Алисон Бекер, но радост не дочекаа во Бело Хоризонте. „Гаучосите“, и покрај поразот, се гневни и на судиите од кои бараа пенали по прекршоците на Алвеш над Агуеро и на Артур над Отаменди на кои остана нем еквадорскиот арбитар Роди Замбрано.
Лионел Меси ќе мора да почека на трофеј со националниот барем до наредното лето и новото издание на Копа Америка на кое Аргентина ќе биде кодомаќин со Колумбија. Бразилскиот селектор Тите, пак, по 42 пат го предводеше „кариоките“ од клупата со кои досега има само два пораза.
https://www.youtube.com/watch?v=Ddf6Bea-lQo
Второто полуфинале меѓу бранителот на титулата Чиле и предизвикувачот Перу е ноќеска (02.30 ч.) во Порто Алегре. Натпреварот за трето место е на 7 јули, ден подоцна ќе биде промовиран и новиот шампион на Јужна Америка.