Судот му одреди 30 дневен притовор на Игор Југ, насилникот од крвавиот четврток, по што тој е вратен во истражниот затвор затвор во Шутка.
Рано утрово од притвор Југ беше донесен во судот откако Основното јавно обвинителство го осомничи дека е водачот на толпата која упадна во Собранието на 27 април, кога насилници тепаа пратеници од опозицијата.
Од Обвинителството информираа дека поднеле обвинителен предлог за водач на толпа, оти пронашле нови докази.
-Од досега прибавените докази од Основното обвинителство произлезе дека покрај за кривично дело Неовластено изработување, држење, посредување и тргување со оружје или распрскувачки материи, постои основано сомнение дека осомничениот преземал дејства како водач на толпа во врска со случувањата во Собранието од 27 април годинава. Поради тоа, надлежниот јавен обвинител донесе наредба за спроведување на истражна постапка и за кривично дело „учество во толпа“ што ќе изврши кривично дело, за кое дело пропишана е казна затвор од една до 10 години, се вели во соопштението.
Обвинителството побара нови триесет дена притвор поради опасност од бегство, попречување на истрагата и можност за повторување на кривичното дело.
Претходно директорот на затворот Шутка, каде ја издржуваше мерката притвор, потврди дека утринава во 5 часот Југ бил спроведен на распит. На Југ, кој беше уапсен на 21 септември му истекуваше 8 дневниот притвор кој му беше одреден веднаш по настаните во Собранието. Беше уапсен во станот на неговиот татко во Куманово. Претходно се товареше за поседување оружје без дозвола.