„Стоп“ за трансфери во Челзи во наредните два преодни рока. Мерката е потпишана од Светската фудбалска асоцијација (ФИФА), откако беше утврдено дека лондонските „сини“ прекршиле еден од нејзините правилници што се однесува на млади играчи. Па, оттука и забраната за пазарни активности до летото во 2020 година.

Освен тоа, премиерлигашот од „Стемфорд Бриџ“ е казнет и со 600.000 швајцарски франци, а Фудбалската асоцијација (ФА) на Англија со 510.000 швајцарски франци. Пред клубот е оставен рок од три дена за обжалување на ваквите одлуки.

Казната за Челзи се однесува за неправилности при купување на фудбалери помлади од 18 години меѓу кои и поранешниот напаѓач Бертран Траоре. Врз основа на документите што излегоа во јавност, под лупа на ФИФА во случајот беа 19 млади играчи во изминатите три години од кои, наводно, 14 биле малолетни.

Новонастанатата ситуација е дополнителен удар за амбициите на Челзи. „Сините“ се мачат на резултатски план низ целиот тек на сезоната, се позасилено се шпекулира со отказ на Маурисио Сари, најавено е заминување на Еден Азар во летниот трансфер период и присутно е незадоволство кај неколку други фудбалери на Челзи кои со задоволство би промениле средина.