Енис Барди беше човек на натпревар за Леванте во победата над Кадиз со 2:1 во тест дуел што се одигра на „Пинатар арена“ во Мурсија. Македонскиот репрезентативец за првпат беше во почетниот состав на екипата од Валенсија и возврати на најдобар можен начин. Му асистира на Хозе Кампана во 16 минута за водство со 1:0 и реализира во 55 минута за 2:0. Играта ја напушти по еден час во измената на тренерот Хуан Муњиз што опфати дури девет фудбалери.
За Барди ова беше трет настап за Леванте по трансферот од Ујпешт. Во претходните два влегуваше од клупа пришто беше и стрелец во убедливиот триумф против нисколигашот Ла Нусија со 5:0 по што следува минимален пораз од Алмерија со 0:1.
Нареден спаринг партнер на Леванте ќе биде екипата на Мурсија во четврток од 20 часот.