Предлози за притвор за едно лице и мерки за претпазливост за две лица кои учествувале во нередите кои се случуваа во четвртокот во Собранието побарало Обвинителството. За останатите две лица за кои МВР поднело известување, обвинителството смета дека нема основано сомневање дека сториле кривични дела, соопштија денеска од Основното јавно обвинителство.
„За едно од лицата за кои МВР поднесе известување, обвинителството цени дека постои основано сомнение дека лицето сторило кривично дело Учество во толпа што ќе изврши кривично дело од член 385 и Предизвикување општа опасност од член 288 од Кривичниот законик. За осомниченото лице до судија на претходна постапка во Основниот суд Скопје 1 Скопје, надлежен јавен обвинител поднесе Предлог за определување на мерка притвор. За две лица, обвинителството оцени дека постои основано сомневање дека сториле кривично дело – Учество во толпа што ќе изврши кривично дело од член 385 од Кривичниот законик и за нив до судија на претходна постапка поднесен е Предлог за определување Мерки на претпазливост“, се вели во соопштението на обвинителство.
За останатите две лица за кои било доставено известување, обвинителството утврдило дека не постои основано сомневање дека сториле кривични дела.
„По однос на другите две лица во тек е натамошно преземање на активности за утврдување на фактите, за да може да се донесе одлука“, пишува во соопштението на Обвинителство.