Основното јавно обвинителство Скопје соопшти дека по допрен глас е отворен предмет за работењето во депонијата „Дрисла“-Скопје за кривично дело Загадување на животната средина и природата од чл.218 од Кривичниот законик.
-Во насока на утврдување на фактите, надлежниот јавен обвинител испрати барање до Министерството за животна средина и просторно планирање за добивање потребни податоци во врска со досегашна извршена контрола над работењето на депонијата ДРИСЛА – СКОПЈЕ ДОО, како и доколку е извршена контрола дали е констатирано почитување на протоколите за согорување на медицински отпад од страна на депонијата и други информации, соопштуваат од Обвинителството.
Јавното претпријатие „Дрисла“ ќе плати казна од 8.500 евра поради тоа што државните инспектори за заштита на животната средина констатирале дека имало надминување на штетните концетрации во воздухот при согорувањето на медицинскиот отпад, соопшти пред неколку дена Државниот инспекторат за животна средина.
Инсенераторот за горење медицински отпад во депонијата Дрисла, кој пред повеќе од 16 години како хуманитарна помош и бил доделен на Македонија од страна на британската Влада, за што Гардијан уште тогаш информираше дека е без неопходните филтри, не работи од 1.јануари годинава.