Големиот триумф на одбојкарите над Унгарија во Будимпешта е искомпромитиран. Репрезентацијата на Македонија го претрпе вториот пораз на домашен терен во квалификациите за ЕП 2019. Ако некако и можеше да се прогледа низ прсти по мечот со Украина (2:3), тоа не е случај овојпат. „Црвено-жолтите“ загубија и од Швајцарија, која допатува во Скопје како аутсајдер, со 3:2 (по сетови: 25:21, 21:25, 23:25, 25:19, 12:15) и драстично ги намалија шансите за место на завршниот турнир од 12 до 29 септември догодина во Словенија, во Холандија, Белгија и во Франција.
Алиби за замор нема оти немаше ниту патување меѓу двата настапа во групата Ф. Македонските одбојкари едноставно беа под нивото, па и поразот дојде како логична последица на настаните на терен. Освен константата во првиот сет, сите останати се одиграа со големи амплитуди. Особено во третиот во кој имаа водство во финишот со 21:18 што на крај го искоцкаа. Со стабилен прием на сервис и цврт блок, Швајцарците успеаја до пресврт за психолошка предност во продолжението на средбата.
Четвртиот сет донесе резултатска нишалка. Подобро отворија гостите кои во два наврата имаа и плус 4 (5:9 и 9:13) за Македонија да успее да направи голема серија од 10:2 и во завршницата да влезе со 19:15. Овојпат успеа да ја задржи за израмнување на 2:2 и во ист ритам го почна решавачкиот сет. Но, на средината повторно дојде до пад во играта и по 7:7, домашните одбојкари постојано беа во минус, а сили за пресврт не останаа за конечни 2:3 и во голема мера намалување на шансите за историски пласман на ЕП.
Швајцарија и Македонија во сабота од 17 часот во „Бетонкуп арена“ во Шененверд го играат реваншот што ќе биде последен настап во квалификациите во овој период од годината. Во претпоследното коло (5/6 јануари), Македонија ќе гостува на Украина, а на 9 јануари ќе игра во Скопје против Унгарија.
Одбојка (м) – квалификации за ЕП 2019
Група А, 3 коло
Финска – Романија 2:3 (18:25, 25:21, 22:25, 25:18, 6:15)
Табела: Романија 4, Финска 4, Данска 1.
Група Б, 3 коло
Естонија – Израел 3:0 (25:19, 25:21, 25:15)
Табела: Естонија 6, Израел 3, Летонија 0.
Група Ц, 3 коло
Црна Гора – Исланд 3:0 (25:15, 25:20, 25:15)
Словачка – Молдавија 3:0 (25:15, 25:21, 25:16)
Табела: Црна Гора 7, Словачка 6, Молдавија 5, Исланд 0.
Група Д, 3 коло
Хрватска – Албанија 3:1 (25:15, 25:21, 19:25, 25:14)
Португалија – Австрија 3:0 (25:20, 25:23, 25:17)
Табела: Португалија 9, Австрија 4, Хрватска 3, Албанија 2.
Група Е, 3 коло
Шпанија – Норвешка 3:1 (25:22, 19:25, 25:22, 25:19)
Белорусија – Грузија 3:0 (25:13, 25:19, 25:12)
Табела: Белорусија 8, Шпанија 7, Норвешка 3, Грузија 0.
Група Ф, 3 коло
Македонија – Швајцарија 2:3 (25:21, 21:25, 23:25, 25:19, 12:15)
Украина – Унгарија 3:0 (25:15, 27:25, 25:19)
Табела: Украина 8, Македонија 4, Унгарија 3, Швајцарија 3.
Група Г, 3 коло
Шведска – Луксембург 3:1 (22:25, 25:14, 25:17, 25:14)
Грција – Азербејџан 3:0 (25:14, 25:18, 25:13)
Табела: Грција 9, Азербејџан 4, Шведска 4, Луксембург 1.