Македонската машка одгојкарска репрезентација со брејк ги отвори квалификациите за Европското првенство во 2019 година. Совладана е Унгарија во Будимпешта со 3:2 во рамки на првото коло во групата Ф што претставува голем исчекор кон завршниот турнир чии ко-домаќини во септември догодина ќе бидат Франција, Словенија, Холандија и Белгија.
Сите пет сета во мечот пред 600 гледачи во унгарската престолнина беа тесни и резултатски неизвесни. „Црвено-жолтите“ ги освоија првиот и вториот со 25:23 за домашните да возврата со иста мера во третиот и во четвртиот сет. Македонските одбојкари беа поприсебни во решавачкиот петти сет, демонстрираа поголема концентрација, ладна глава и поголема желба за триумф во што и успеаја (16:14) по 143 минути.
Централна фигура на средбата беше Никола Ѓорѓиев со неверојатни 42 поена.
Во вториот меч во групата Ф, Украина во Запорожје ја совлада Швајцарија со максимални 3:0 (по сетови: 25:16, 25:16, 25:20).
Веќе во сабота во Скопје (СРЦ „Кале“, 20,30 ч.), Македонија ја пречекува Украина во второто коло, а до крајот на месецот одбојкарите ќе одиграат два меча и против Швајцарија. Најпрво ќе бидат домаќини на 22 август (СРЦ „Кале“, 20,30 ч.) за три дена подоцна да гостуваат во Шененверд (17,30 ч.). Потоа ќе следува пауза од четири месеци во циклусот што ќе продолжи по Нова година со дуели против Украина во гости и против Унгарија на домашен терен на 9 јануари.
Квалификации за ЕП 2019 во одбојка (м)
Група А
Романија – Данска 3:2 (по сетови: 21:25, 25:20, 24:26, 25:22, 15:11)
Данска – Финска (18 август)
Група Б
Израел – Летонија 3:0 (25:23, 29:27, 25:13)
Група Ц
Словачка – Исланд 3:0 (25:7, 25:15, 25:17)
Молдавија – Црна Гора 3:2 (24:26, 19:25, 25:22, 25:19, 15:12)
Група Д
Португалија – Албанија 1:1 (во тек)
Австрија – Хрватска 1:1 (во тек)
Група Е
Шпанија – Грузија 3:0 (25:9, 25:12, 25:6)
Белорусија – Норвешка 3:1 (25:17, 28:26, 18:25, 28:26)
Група Ф
Унгарија – Македонија 2:3 (23:25, 23:25, 25:23, 25:23, 14:16)
Украина – Швајцарија 3:0 (25:16, 25:16, 25:20)
Група Г
Грција – Луксембург 2:0 (во тек)
Азербејџан – Шведска 3:2 (23:25, 19:25, 26:24, 25:22, 15:10)