Франција избегна изненадување на стартот на Светското првенство во Русија. „Триколорите“ ја совладаа Австралија со 2:1 пришто мораа добро да се испотат за трите бода претпладнево во Казан. Ги освоија благодарение на погодокот на Пол Погба во 81 минута оставајќи ги „сокероси“ со утеха дека беа на праг да ја загорчат премиерата на еден од фаворитите за титулата.
Средбата на „Казањ арена“ ќе остане во мундијалските анали како прва во која ВАР технологијата влијаеше на резултатот. Моментот се случи во 57 минута во која главниот судија од Уругвај Андрес Куња ја промени одлуката и по прегледување на видео снимка досуди пенал за Французите. Најстрогата казна дојде како последица на страт на Џош Рисдон врз Антоан Гризман, а напаѓачот на Атлетико Мадрид ја презеде одговорноста и не погреши.
Радоста на „триколорите“ кратко траеше. Самуел Умтити направи глупост во сопствениот казнен простор, играше со рака по нафрлувањето на Австралијците за што Куња овојпат немаше дилеми. Веднаш иуспружи рака кон белата точка од која Миле Јединак израмни на 1:1.
https://www.youtube.com/watch?v=SSxA94jJP5w
Со тој резултат на семафорот се влезе во последните десетина минути од натпреварот. Меѓутоа наизглед неизгледната ситуацијата пред австралискиот гол донесе нова радост за составот на Дидие Дешамп. По две одлични додавања, Пол Погба се закани, топката закачи еден одбранбен фудбалер на „сокероси“ и во висок лак го префрли Рајан и заврши зад линијата од неговиот гол за конечни 2:1.
Во првото коло во групата Ц, попладнево од 18 часот во Самара, ќе играат Перу и Данска.
Франција – Австралија 2:1 (0:0)
Стадион: „Казањ арена“ во Казањ. Гледачи: 45.105. Гл. судија: Андрес Куња. Асистенти: Николас Таран и Маурисио Еспиноза (сите тројца од Уругвај). Ж. картони: Толисо (Франција); Леки, Бехиќ, Рисдон (Австралија). Стрелци: Гризман 58’ (п), Погба 81’ за Франција; Јединак 62’ за Австралија.
Франција (формација 4-3-3): Лори – Павар, Варане, Умтити, Ернандез – Толисо (Матуиди 78’), Канте, Погба – Дембеле (Фекир 70’), Мбапе, Гризман (Жиру 70’). Селектор: Дидие Дешамп.
Австралија (формација 4-2-3-1): Рајан – Рисдон, Милиган, Сајнсбјури, Бехиќ – Јединак, Мој – Леки, Рогиќ (Ирвајн 72’), Крусе (Арзани 82’) – Набут (Јуриќ 64’). Селектор: Берт ван Марвијк.