Државната изборна комисија (ДИК) на денешната седница донесе едногласна одлука за стопроцентно зголемување на надоместокот за членовите на избирачките одбори, 20 отсто поголем надоместок да добијат членовите на општинските изборни комисии, а здравствените работници што учествуваа во процесот да добијат по 6.000 денари.
„Предложивме нашиот Правилник што го донесовме уште во февруари, да го измениме поради новонастанатата ситуација со кратките рокови со кои се соочивме при неколкукратното одложување на предвремените парламентарни избори, но и ковид-ситуацијата што сериозно можеше да влијае врз здравјето, пред сè, на гласачите, а со оглед дека станува збор за членови на изборни органи кои учествуваа во спроведување на изборите“, нагласи членот на ДИК, Елизабета Постоловска.
Таа рече дека едногласно се согласиле надоместокот за членовите на избирачките одбори да биде зголемен за сто отсто со оглед на тоа дека тие биле најдиректно изложени на контакт со гласачите и биле изложени на најголем ризик по нивното здравје.
„Исто така го зголемивме надоместокот за 20 отсто на членовите на општинските изборни комисии поради организација и успешно спроведување. Ќе ги спомнам и здравствените работници, оние што не се откажаа да бидат членови во посебните избирачки одбори и кои беа свесни за нивната општествена и хумана одговорност, па според тоа успешно го спроведоа гласањето на лицата во изолација и болните со Ковид-19, па поради тоа во нашиот правилник предвидовме надоместокот да биде ист за сите – 6.000 денари, односно во висина на најголемиот надомест којшто ќе го земе претседател на изборен орган“, нагласи Постоловска.
Таа истакна дека сумите не се награда за сработеното, тука се реален надомест за секој учесник во изборниот процес во рамки на неговите обврски и надлежности, што ги сработил успешно и професионално, согласно тешките здравствени аспекти.
Претседателот на ДИК Оливер Дерковски посочи дека сумите што се определени не отстапуваат од буџетскиот лимит, со оглед на тоа што се заштедени средства од предвидените за гласањето на дијаспората, како и за јавни набавки.