Она што деновиве се најавуваше, денеска доби и потврда. Марчело Липи е нов селектор на Кина. При назначување на функцијата пред 68 годишниот италијански стручњак е поставена јасна цел – пласман на светското првенство во Русија во 2018 година.
Предизвикот со кој е сооочен Липи не е нималку лесен и наивен. Кина загуби од Узбекистан со 0:2 во квалификациите што резултира со оставка на Гао Хонгбо, до неодамна предводник на националниот тим. По четири одграни меча Кинезите имаат само еден бод.
Липи ќе дебитира на 15 ноември во натпревар со Катар на домашен терен. Во групата уште се и селекциите на Иран, Јужна Кореја и Сирија.
Досието на, сега веќе, новиот кинески селектор е пребогато. Има пет титули во Серија А со Јувентус, четири во Суперкупот на Италија и по една во италијанскиот Куп, Лигата на шампиони, европскиот Суперкуп и во Интерконтиненталниот куп. Со Италија стана светски првак во 2006 година.