Француските натпреварувачи Рајмон Аксел и Ошан Касињо се победници на јубилејното 50-то издание на пливачки маратон од серијата Ултра пливачки маратони на Светската пливачка федерација (ФИНА) што денеска се одржа во водите на Охридското Езеро.

Патеката долга 25 километри од Свети Наум до пристаништето во Охрид, Аксел ја исплива за 5:10:31 часа, победувајќи за неколку метри пред второпласираниот Едуардо Стокино од Италија (5:10:32 часа), додека трет на целта со задоцнување од само три секунди пристигна нашиот Евгениј Поп Ацев.

Во женска конкуренција најуспешна беше Ошан Касињо од Франција на која ѝ беа потребни 5:16:39 часа за да ја исплива патеката „Климе Савин“. Втора беше Каролин Жуис со време 5:45:42 часа, а трета на целта пристигна Аргентинката Пилар Гелјо со време 5:47:21 часа.

Патеката ми е позната, навикнат сум тука да пливам и да победувам. Условите беа добри, времето релативно поволно. Како пливач не сакам да пливам напред и да ги повлекувам другите, најдобро се снаоѓам кога сум со останатите во група, а пред целта го засилувам темпото. Така беше и овојпат, водев битка со останатите пред самата цел и среќен сум што повторно прв пристигнав на целта, изјави Аксел по третата победа на Охридскиот пливачки маратон.

Нашиот маратонец Евгениј Поп Ацев изрази задоволство од трката и од постигнатиот резултат во силната конкуренција што ја имаше.

Задоволен сум од постигнатото. Блиску бев до победникот и до второто место. Можев да бидам и прв, но исто така можев и да бидам и послабо пласиран. Трката беше добра, за среќа немаше невреме, иако такви беа прогнозите. Наместа имаше мали бранови, но условите се исти за сите. Ова е прва трка, ќе ги пливам и останатите маратони така што разликата во бодови не е голема, рече Поп Ацев.

Наградниот фонд на пливачкиот маратон изнесуваше 10.000 долари, рамномерно распореден во двете категории.

Првиот Ултра маратон што требаше да се одржи во Канада е откажан, додека после охридскиот на распоредот се уште две трки – на патеката Капри во Италија и Росарио во Аргентина.

Инаку, ова е 50-ти пат светската пливачка елита да се собере на Охридското Езеро, а 35-та трка од возобновувањето на Охридскиот пливачки маратон.