Основното јавно обвинителство, одговарајќи на новинарско прашање на НОВА, информира дека надлежен јавен обвинител го повикал на разговор братот на функционерот на ДУИ, Бекир Асани, Бејтула, кој му се заканувал на претседателот на Здружението на новинари, Насер Селмани.
Воедно, според ОЈО и Селмани бил повикан на информативен разговор во Обвинителството.
„За настанот за кој покажувате интерес ве известуваме дека во Основното јавно обвинителство Скопје е примено писмено известување од СВР Скопје – Единица за насилен криминал и истото е веднаш распоредено кај надлежен јавен обвинител кој постапува по предметот. Во насока на утврдување на фактите, надлежниот јавен обвинител презема дејствија за прибирање на потребни податоци. Повикани се и оштетениот и лицето што го дало коментарот за да дадат исказ во обвинителството“, се вели во одговорот од ОЈО.
Во изјава за НОВА пак, Селмани вели до утрово пред да излезе на работа, покана до него од Обвинителството немало, а освен кога ги поднел пријавите во полиција, со јавен обвинител нема разговарано.
„Досега не сум разговарал со обвинител. Само кога ги поднесов пријавите во полицијата имав разговор. Покана можеби стигнала дома денеска, но до утрово, пред да излезам, не сум добил никаква ниту сум имал разговор некаков“, вели Селмани.
Заканите на Бејтула Асани кон Селмани, беа упатени кога претседателот на ЗНМ, неодамна објави на Фејсбук критики кон Бекир Асани поради инцидентот кој го предизвика неодамна, напаѓајќи полицајка која им асистирала на пајак-службите додека му се отстранувало возилото за непрописно паркирање.
Веднаш по заканите на Бејтула, реагираше Насер Селмани со нова објава на Фејсбук дека нема да биде замолчен, по што пак, следуваше интервју на Бекир Асани, кој во интервју за Мактел, со погрдни зборови и сексистички го нападна претседателот на ЗНМ нарекувајќи го „копиле“ и „дно“.
Новинарите денеска, со цел да му искажат поддршка на првиот човек на ЗНМ, излегоа на протест, порачувајќи и на власта да ги задржи своите луѓе кои се обидуваат со вакви напади врз новинарите да ја замолчат јавноста, а особено по силните реакции законот да важи за сите и Бекир Асани да не биде имун на правдата откако ја нападна полицајката Јасмина Јаначковска, за што доби само прекршочна пријава од МВР.