Тргна кампањата, тргна промоцијата на платформите на политичките партии преку кои ќе се бараат гласови од граѓаните на изборите на 15 јули, а тргна и промоцијата на кандидатите за пратеници во новиот парламентарен состав. За тоа во најголема мера се користат социјалните мрежи и медиумите, но првиот „натпреварувачки“ ден донесе „окупација“ и на рекламните паноа и билборди на јавните места.
Според Упатството за распределба на рекламни паноа и билборди, 40 проценти од локациите се достапни за партиите на власт, исто толку се наменети и за партиите во опозиција, а по 10 проценти од локациите се достапни за парламентарните партии кои немаат пратеничка група и за вонпарламентарните партии.
Доколку некоја политичка партија, коалиција или независен кандидат не го искористат вкупниот процент на закуп, тогаш останатите политички парти и независни кандидати имаат право на закуп на тие локации.
„Политичката партија или коалиција која нема да го искористи вкупниот процет за закуп на рекламни паноа и болборди или локации е должан да ја извести Државната изборна комисија за тоа. ДИК во дополнителна постапка ќе ги распредели неискористените рекламни паноа и билборди или локации на останатите политички партии или коалиции согласно член 78-а од Изборниот законик“, се вели во Упаството.
На 18 јуни во Државната изборна комисија се спроведе ждрепка за доделување на локациите на рекламните паноа и болборди. Освен овие опции за политичко рекламирање, на партиите во изборниот период на располагање им стои и опцијата за платено политичко рекламирање.