Најмалку 106 цивили загинаа во вчерашните бомбардирања на сириските владини сили врз Источна Гута, која е под контрола на бунтовниците, соопшти Сирискиот центар за мониторинг на човековите права.
Со ова, вкупниот број на загинати во изминативе 48 часа достигна 250 лица. Тоа се најкрвавите две деноноќиа по хемискиот напад во областа во август 2013 година, во кој загинаа стотици луѓе.
Американскиот Стејт департментот соопшти дека е „исклучително вознемирен“ поради случувањата во Источна Гута, а францускиот министер за надворешни работи Жан-Ив Ле Дријан истакна дека работите во оваа сириска област одат кон „хуманитарна катаклизма“
Генералниoт секретар на ОН Антонио Гутереш е „длабоко вознемирен“ од ескалацијата на насилството во Источна Гута, соопшти портпаролот на светската организација Стефан Џужарик.
Тој додаде дека Русија, Иран и Турција ја прогласија Источна Гута за зона за деескалација и потсети дека според Гутереш, сите страни треба да ги преземат „своите ангажмани во таа насока“.
Битката за сириската енклава под опсада Источна Гута би можела да прерасне во повоторено сценарио на битката за Алепо, предупреди специјалниот пратеник на ОН за Сирија, Стафан де Мистура.
– Постои опасност да стане второ Алепо, а ние, се надевам, ја научивме лекцијата од тој судир – изјави Мистура.
Источна Гута е предградие на Дамаск под контрола на сириските бунтовници, чиј реон е опколен од владините сили.
Инаку, битката за Алепо траеше од 2012 до 2016 година, во текот на која загинаа 31.112 лица, вклучувајќи и голем број цивили.