По минатонеделното отстранување на нелегални објекти и урбана опрема, екипи на општинските јавни претпријатија во координација со Општина Охрид од денеска ќе започнат со активности за уредување на крајбрежниот простор на Охридското Езеро на потегот од „Горица 3“ до „Аквалина“.
„Оваа седмица ќе се врши расчистување на теренот, подигнување на градежниот шут и несоодветниот материјал (тампон), со кој било вршено насипување на крајбрежјето. Досега се подигнати преку 1000 кубни метри градежен шут. Во текот на наредните денови ќе се врши насипување и уредување на плажата со речна песок што е дозволена согласно Планот за управување со светско природно и културно наследство на Охридскиот регион“, се вели во соопштението на Одделението за односи со јавност при Општина Охрид.
Од таму и апел до сите сопственици на објекти на крајбрежниот појас од населбата „Свети Стефан“ до потегот на крајбрежјето кај „Градиште“, како и потегот на крајбрежјето во делот на населбата „Канео“ и во делот на населбата „Далјан“, кои нелегално поставиле урбана опрема и платформи, а на кои им беше даден рок самите да ги отстранат нелегалните градби, оваа седмица да го сторат тоа.
„Процесот на отстранување на урбаната опрема и бесправните градби од крајбрежниот појас на Охридското Езеро ќе трае до конечно расчистување на крајбрежјето“, стои во дописот од Општина Охрид.