Министерството за финансии ни должи 25 милиони денари и го одолговлекува враќањето, обвинија денеска од Општината Центар.
Од таму велат дека веќе неколку пати формално ги бара парите кои министерството треба да им ги врати, одговор се уште нема.
„Во судскиот спор помеѓу Министерството за транспорт и врски и општина Центар од 2013 година, судот првично пресудил во корист на министерството, по што на општината и се повлечени 25 милиони денари од сметката. По жалбата на општината и направената ревизија, Врховниот Суд го враќа предметот во Основниот Суд, кој при новото разгледување досудува одлука во корист на Општината. Министерството за транспорт ја прифаќа одлуката на судот и со големо оддолжување, сепак, доставува налог до Министерството за финансии да се вратат средствата кои и биле одземени на општина Центар. Оттогаш е поминат подолг период, но министерството за финансии не ја извршува трансакцијата. Ова не е прв пат министерствата да ја опструираат работата на Општината Центар“, пишува во соопштението од општината.
Од таму го повикуваат министерот Кирил Миновски итно да ја реализира трансакцијата.
На ова од министерството велат дека општината до Министерството за финансии поднела барање и банкарска сметка за извршување на поврат на 25 милиони денари. Од министерството додаваат дека за да се исплатат парите министерството треба да донесе решение за поврат, кое е во тек.
„Очигледна е тенденцијата на Општината Центар да го злоупотребува министерството за финансии за политичка пропаганда“, реагираат од министерството.
Од кабинетот на Миновски апелираат Општина Центар да не го злоупотребува Министерството за финансии за политички маркетинг.