Игра за престиж, за сопствено достоинствено, за чесно збогување со меѓународната сцена и со желба за барем еден гол во мрежата на Милан во последните 90 европски минути во ова лето. Со ваква цел Шкендија ќе влезе во утрешниот реванш со Милан во плеј-офот за Лига Европа. Патникот за групната фаза од двомечот е познат уште по првиот натпревар во Милано, па македонскиот вицепрвак е пред предизвик за поправање на впечатокот во првиот настап на „Телеком арена“ по трите претходни на „Младост“ во Струмица против Дачија, Хелсинки и Тракаи.
„Ќе играме за чест, а имаме и обврска за поправање на впечатокот. Скапо ги плативме емоциите во Милано и настрадавме поради индивидуални грешки. Деновиве се фокусиравме на нивно елиминирање и да не ги повториме во реваншот. Тешко е да имате посед на топка против екипа каква е Милан меѓутоа не планираме да се браниме. Овојпат немаме што да загубиме. Сакаме да играме и се надевам дека ќе успееме да постигнеме гол. Измени во составот ќе има, но нејасно е дали ќе може да сметаме на Ферхан Хасани и на Жуниор поради повреди“, изјави менаџерот на Шкендија, Ќатип Османи.
Шкендија е свесна за преголемиот залак што го има во Милан и свесна е дека има негатива што е недостижна против клуб каков што е седумкратниот европски шампион. Па, затоа како единствен императив над тетовскките „црвено-црните“ се наметнува добро издание против големиот противник.
„Сакаме да покажеме дека изданието на „Сан Сиро“ не е вистинското лице на Шкендија. Нагетивата е, секако, голема, но ние сме цврсто решени да излеземе на терен и одиграме најдобро што знаеме и умееме. Евентуална победа ќе значи многу и за нас фудбалерите и за клубот и за навивачите. Ќе биде тешко, но наше е да се обидеме. И ќе се обидеме. Во тоа нема сомневање“, порача капитенот на тетовци, Ферхан Хасани.
Правдата во реваншот меѓу Шкендија и Милан е доверена на судиска тројка од Романија. За главен арбитар е делегиран Иштван Ковач чии асистенти ќе бидат Василе Флорин Маринеску и Овидиу Артене. Мечот на „Телеком арена“ е со почеток од 20,45 часот.