Министерот за надворешни работи Бујар Османи при учеството на редовниот состанок на министрите за надворешни работи на НАТО, кој се одржа во Рига, ја истакна потребата за заедничко, стратешко делување и пристап на НАТО и ЕУ кон Западен Балкан како основен предуслов за стабилноста и просперитетот на регионот.
Како што соопштуваат од МНР, за време на дводневните работни сесии биле разгледани прашања од стратешко значење на Алијансата, како што се состојбите во Авганистан, справување со актуелните и идни безбедносни предизвици, како руското воено групирање околу границата со Украина и хибридните предизвици кои доаѓаат од Белорусија.
Исто така, како што се вели во соопштението, тема на состанокот била и состојбата во Западен Балкан и геостратешките интереси на Алијансата за стабилен, прогресивен и демократски регион преку реафирмирање на европската и евро-атлантската перспектива на земјите од регионот.
Министрите за надворешни работи дискутираа и за Стратешкиот концепт на НАТО, како значаен документ во однос на идната геостратешка улога на Алијансата.
На работните сесии, додаваат од МНР, министрите усвоија повеќе одлуки и документи и истите се значајни за идното делување и зајакнување на Алијансата но и за подготовка на Самитот на шефови на држави и влади на НАТО, кој наредната година ќе се одржи во Мадрид.
Османи меѓу другото потенцираше дека сме сведоци на влошување на глобалното стратешко опкружување и деградацијата на меѓународниот правен поредок. Ја истакна потребата за заедничко, стратешко делување и пристап на НАТО и ЕУ кон Западен Балкан како основен предуслов за стабилноста и просперитетот на регионот.
На маргините на состаноците, министерот за надворешни работи, Бујар Османи остварил повеќе средби, како со помошник државениот секретар на САД, Карен Донфрид, министрите за надворешни работи на Словенија, Анже Логар, на Норвешка, Аникен Ш. Хјитфелт, на Франција, Жан-Ив Ле Дриан и на Р. Чешка, Јакуб Кулханек.