Вицепремиерот за европски прашања Бујар Османи денеска се сретна со шефот на грчката дипломатија Никос Коѕијас. Двајцата, како што соопштија од прес слуќбата на вицепремиерот Османи, разговарале за напредокот во меѓусебната соработка, активностите на двете земји за унапредување на комуникацијата, како и мерки за градење доверба меѓу двете земји.
– Имаме голем напредок во комуникацијата меѓу двете земји, што води кон очигледно зголемување на довербата меѓу државите, но и севкупно, зголемување на довербата меѓу двете општества, истакнал Османи, изразувајќи надеж дека тоа набргу ќе резултира и со надминување на отворените прашања.
Османи, како што соопшти СЕП, изразил надеж дека во периодот што следи ќе се засилат мерките за градење доверба во сите области – економијата, културата, образованието, екологијата, меѓуграничната соработка, енергетиката, транспортот… со што покрај изградбата на довербата меѓу општествата, граѓаните ќе можат и директно да ги почувствуваат бенефитите од оваа соработка.
Вицепремиерот во овој контекст изразил задоволство од успешниот старт во примена на мерките за доверба, како што е преминување на земјава во втората фаза од Спогодбата за стабилизација и асоцијација, како и пристапот до Јадранско-јонскиот регион.
Османи ја потенцирал успешната билатерална соработка меѓу Македонија и Грција, која е исклучително позитивна во делот на искористување на средствата од ИПА во проектите за прекугранична соработка, како и соработката во рамки на твининг проекти и инструментот ТАЕКС.
Двајцата соговорници се согласиле дека евро-атлантските интеграции на земјава се единствена алтернатива со која ќе се зајакнат и стабилноста и безбедноста на регионот, како и да се одржи комуникацијата меѓу двете земји со отворен дијалог за партнерство, се додава во соопштението на СЕП.