Разликата меѓу политичките партии околу датумот за одржување на предвремените парламентарни избори не се така големи и во наредниот период очекувам да се дојде до консензус, нагласи вицепремиерот во Владата, Бујар Османи во интервју за „Независен“. Во спротивно, како што вели, ќе биде штетно по државата ако кон здравствената и економската криза се надоврзе и политичка.
За ДУИ, потенцира Османи во интервјуто, е прифатлив секој датум до декември, па така и 5 јули кој, пак, се погласно се заговара низ кулоарите како можен термин за вонредните избори што беа закажани за 12 април, но и одложени поради пандемијата на ковид-19. Потоа, нагласува тој, условите за организирање на процесот ќе бидат потешки оти во меѓувреме се планира отворање на границите, па голема е веројатноста дека граѓаните ќе заминат на летен одмор во некоја од странските дестинации.
„Најмалку што би посакале сега, и ние и граѓаните, е нова политичка криза и нови препукувања меѓу партиите во услови на пандемија. Мислам дека тоа би било најомразеното нешто за граѓаните доколку видат дека сега, кога е најважна сплотеноста на сите за да излеземе од здравствената и економската криза, ние политичарите да покажуваме ниско ниво на свест и да се закопуваме во партиските ровови и интереси. Кој и да го прави ова ќе изгуби во очите на граѓаните. Затоа сметам дека ниту една политичка партија нема да оди до својот екстрем, да предизвика политичка криза во овие услови. Разликите за датумот не се многу големи“, потенцира Османи.
Според него, 5 јули не само што не е лош датум за избори, туку верува дека ќе биде прифатлив за сите, истакна дека партиите имаат постојана меѓусебна комуникација, но покана за нова лидерска средба засега немаат добиено.