Специјалните пајак возила во текот на минатата недела подигнале вкупно 167 автомобили од јавните површини од кои 21 е отстранет од зонските паркиралишта, а останатите 146 возила по налог на сообраќајната полиција по основ на сторени прекршоци – паркирање на коловоз, на велосипедска патека, на пешачки премин, на тротоар, на зелена површина, спротивно на сообраќајните знаци, како и по повик од трето лице.
Како што е наведено во соопштението од Град Скопје, контролорите на зонските паркиралишта во истиот период санкционирале вкупно 361 возило, поради нерегулирано паркирање, односно за неплатена паркинг-услуга. Од нив, 21 возило се отстранети со пајак службата, поради пречекорување на дозволеното време на задржување на паркиралиштето.
Градот Скопје и јавното претпријатие „Градски паркинг“ апелираат до граѓаните да го чуваат зеленилото и другите јавни површини, а своите возила да ги паркираат исклучиво на означените паркиралишта.
„Апелираме до сите корисници на услугите за паркирање, навреме да го регулираат плаќањето за паркинг-услугата за да не бидат санкционирани и да не им биде поставен блокатор на тркалото. Плаќањето за паркинг-услугата може да се изврши преку СМС порака или со греб картичка“, се наведува во соопштението од Град Скопје.