Вардар во четвртокот го направи најголемиот, историски, успех на македонскиот клупски фудбал со елиминацијата на Фенербахче и пласманот во групната фаза во УЕФА Европа лигата. Емоциите сè уште не се легнати и нема да бидат во текот на цела есен, но впечатоците се сумирани. Одлична игра на „црвено-црните“, две заслужени победи за, конечно, пробивање на бариерата наречена плеј-оф во клупско фудбалско натпреварување на стариот континент.
„Завршивме голема работа, постигнавме фантастичен успех. Елиминиравме клуб кој во секоја смиссла е Реал Мадрид во овој дел од Европа. Сакаме ова да ни стане навика. Нема да си создаваме притисок дека мора да играме групи секоја година, би било премија да бидеме во оваа фаза во која сме и на секои две години, но да не чекаме нови 25 години. Го имаме Чеде Јаневски на кого сметаме на долг рок, за наредните пет години, имаме играчи кои се претставија како победници, потребни се позитивни мисли и влечење на добри потези“, истакна вардаровата легенда, Дарко Панчев, сега во улога на спортски директор на македонскиот шампион.
Ждрепката за групите во ЛЕ ги смести вардарци во групата Л со Зенит, со Реал Сосиедад и со Розенборг. Но, обезбедувањето на место во неа било како цела вечност за црвено-црната „деветка“ како функционер одошто во времето кога ги тресеше противничките мрежи.
„Бев напнат, бев нервозен, не можев да ги гледам на раат дуелите со Фенербахче. Ми беше полесно кога играв. Меѓутоа вербата дека можеме до ова не ме напушти во ниту еден момент. На двомечот му претходеше одлична анализа, беше направена одлична тактика и турскиот великан беше надигран. Најзаслужни за овој резултат, секако, се фудбалерите и тренерот. Имав среќа да бидам дел од генерација со победнички менталитет во мојата фудбалска кариера што сега се обидувам да го пренесам на помладите. А, и тие сега покажаа дека се победници“, посочи популарната „Кобра“, златната копачка на Европа од 1991 година.
Вардарци, како никогаш досега, ги очекува набиена есенска агенда. Настапите во Европа лигата почнуваат на 14 септември до меч на домашен терен против Зенит и ќе траат до 7 декември со гостување на Розенборг на „Телеком арена“. Во меѓувреме ќе бидат присутни и обврските во домашното првенство, во Купот на Македонија, а за дел од играчите и репрезентативни активности во наредните три месеци вклучувајќи ги и ноемвриските термини за баражи за Светското првенство во Русија во 2018 година.