Најмалку 94 лица се уапсени, а 11 се повредени за време на денешните протести на „жолтите елеци” во Париз.

Цел на демонстрантите повторно беа луксузни продавници во близина Триумфалната порта, а полицијата беше предизвикана да реагира, откако демонстрантите почнаа да фрлаат димни бомби и камења врз униформираните службеници.

Притоа беа употребени водени топови за растерување на најагресивните демонстранти кои се лоцираа меѓу продавници на „Картие“ и „Мон Блан“, а се употреби и солзавец.

Демонстрантите запалија автомобилски гуми и кршеа излози на, пред се, луксузни продавници како „Кензо“ и „Лакоста“. Во еден од подметнатите пожари се повредени 11 лица.

На денешните собири што се одржуваат под слоганот „Ултиматум“, на улицата Шанзелизе, по слободна проценка, се собраа околу 8.000 приврзаници на движењето „жолти елеци“, од кои, според францускиот министер за внатрешни работи Кристоф Кастане, околу 1.500 се „ултра насилници“ кои пристигнаа во Париз да предизвикуваат немири и судир со полицијата.

Ова е 18 сабота по ред на протести на „жолтите елеци” против политиката на претседателот Емануел Макрон.