Пациентите со дијабет повторно на иста мака.
И овој месец во инсулинските аптеки не ја добиле комплетната терапија, односно наместо по две кутии со ленти за мерење на шеќерот во крвта, некои добиле половина, а други ниту едно. За проблемот алармираа до нашата редакција.
„За проблемот со лентите за мерење на шеќер, за кој објавивте минатиот месец, би сакал да ве информирам дека повторно се соочуваме со истиот проблем. Ќе ви доставам и доказ“, ни пиша пациент со дијабет.
Потврда добивме и од друга пациентка која исто така се пожали дека веќе три месеци нема добиено ленти за гликемија.
Од Министерството за здравство, во одговор за НоваТВ, велат дека во моментов сите инсулински аптеки се снабдени со ленти за мерење на шеќер во крвта.
„Дел од пациентите поради мал технички застој во снабдувањето добиле по една кутија ленти, но застојот е веќе надминат и пациентите можат во инсулинските аптеки да ги добијат и останатите количини на ленти“, велат во одговор на нашето прашање од Министерството за здравство.
Оттаму, сепак не појаснија зошто дијабетичарите во последно време континуирано се соочуваат со истиот проблем?
По реакции од пациенти, НоваТВ и пред еден месец алармираше за проблемот со недостиг на ленти за мерење на шеќер во крвта. Истиот ден дистрибутерот достави до инсулинските амбуланти 2000 кутии со ленти, а Министерството за здравство уверуваше дека проблемот е надминат.
Од Сојузот на здруженија на дијабетичари денеска доставија барање за референтни цени до Министерството за здравство и до Фондот за здравствено осигурување по примерот на соседните земји, каде пациентите со потврда за помагало, можат да си купат ленти по сопствен избор во најблиската аптека.
„Целта на ова барање е воспоставување нов модел на набавка и достапност до квалитетни глукомери и ленти за мерење на гликемија за секој пациент со Дијабетес тип 1 и тип 2 што примаат инсулин по т.н. референтна цена. Ние бараме, да се надминат и решат сите недостатоци, непознаници, а воедно истите да бидат во секое време достапни до секој пациент во најблиската аптека, по референтна цена и дополнително ленти и апарати по избор на секој пациент. И да им се овозможи на пациентите со дијабетес во Северна Македонија, да имаат избор на квалитетни апарати и ленти за мерење шеќер“, информира претседателот на Сојузот, Диме Велев и додава дека барањето во форма на копија по електронски пат било испратено и до кабинетот на Претседателот на Владата.
Инаку, една месечна терапија за набавка на ленти на приватно секој пациент го чини во просек околу 800 денари. Цените се движат помеѓу 600 и 1200 денари во зависност од производителот.
(Б.Божиновска)