Денеска, откако во некои медиуми се појавија наслови дека Јанева е пред помилување, од кабинетот на Пендаровски го демантираа тоа и рекоа дека нејзината молба е одбиена и дека на 19 мај ќе биде објавена во Службен весник со што одлуката ќе стане и официјална.
Според одделни медиумски извештаи и експретседателот на Основниот кривичен суд Скопје, Владимир Панчевски, и бизнисменот Сеад Кочан се обиделе да го искористат институтот помилување – еден од надлежностите на претседателот на државата – за да излезат предвреме од затвор каде што издржуваат повеќегодишни казни, но и тие биле одбиени во претходна процедура.
Јанева и Панчевски по првпат бараат помилување од шефот на државата, додека бизнисменот Сеад Кочан бараше и во 2021 година, но не доби.
Процедурата е регулирана со Законот за помилување, а во одделот насловен „Комисија за помилување“ на интерент-страницата на претседателот на државата е појаснето како тече целата постапка.
Имено, постапката за евентуално помилување на осудени лица од страна на претседателот почнува со поднесување молба за помилување до судот кој ја донел првостепената судска одлука.
Потоа, молбата заедно со потребната документација судот ја доставува до Министерството за правда. Согласно законската постапка, министерот за правда ги разгледува молбата и останатите документи и дава свој предлог до шефот на државата.
Оттука постапката ја презема Комисијата за помилување на претседателот на државата, која на редовни седници поединечно ја разгледува секоја пристигната молба за помилување заедно со предлогот на министерот за правда.
Инаку, Комисијата за помилување е постојано работно тело во служба на претседателот.
Откако ќе ги разгледа документите, Комисијата со мнозинство гласови од присутните членови утврдува мислење, односно предлог кој потоа го доставува до шефот на државата.
Врз основа на мислењето на Комисијата, како и врз основа на предлогот на министерот/министерката за правда, претседателот на државата донесува конечна одлука.
Претседател на Комисијата за помилување е Уранија Пировска, а нејзини членови се: Фехми Стафа, Љубомир Јовески, Љубомир Михајловски, Кимо Чавдар, Ерол Рушид, Томислав Кежаровски, Сафет Алиу, Зора Митиќ и Билјана Петковска.
За Јанева, Панчевски и Кочан исходот од целата процедура завршил безуспешно, бидејќи конечната одлука на претседателот била негативна.
Бизнисменот Сеад Кочан, пак, пресудата во случајот „Труст“ на СЈО, во кој беше обвинет за злоупотреба при постапка за јавни набавки, првостепената пресуда на Основниот кривичен суд Скопје ја дочека на 20 јули 2018 година, со која беше осуден на затворска казна од шест години. Апелацискиот суд потоа му ја намали казната на 4 години и 8 месеци.