Портпаролот на Кремљ Дмитриј Песков рече дека денешните руско-американски преговори во Саудиска Арабија би можеле да донесат „повеќе јасност“ во врска со евентуалната средба лице в лице меѓу претседателите Доналд Трамп и Владимир Путин.
Путин постојано повторува дека е подготвен да зборува за мир, рече тој, инсистирајќи дека Русија сака да ги постигне своите цели, но претпочита да го стори тоа „на мирен начин“.
На прашањето дали Украина може да влезе во Европската Унија, Песков одговори: Тоа е суверено право на секоја земја, ние нема да диктираме.
Тој, исто така, рече дека Москва нема да ја спречи Украина да се приклучи на Европската Унија, повторувајќи дека останува против Киев да биде дел од НАТО.
Се разбира, сеопфатно решение, долгорочно решение, одржливо решение (во Украина) е невозможно без сеопфатно испитување на безбедносните прашања на континентот, истакна Песков по изјавата на американски официјални лица дека за Европска Унија нема да има место на преговарачката маса, но дека интересите на регионот ќе бидат земени предвид.
Песков посочи дека Москва „внимателно ќе следи“ дали Европа ќе формира заедничка армија.
Сè уште не знаеме дали оваа армија ќе постои, не знаеме врз основа на која ќе биде создадена. ЕУ досега немаше заеднички одбранбен аспект. Но, што се однесува до долгорочните планови, се разбира, тие треба многу внимателно да се следат, да се проучат и да се донесат заклучоци, истакна Песков.
Тој повтори и дека претседателот на Русија, Владимир Путин е подготвен да разговара со украинскиот претседател Володимир Зеленски „ако биде потребно“.