Писмата на Грција до ЕУ и НАТО, со кои потврдува дека не се противи за европска и евро-атлантска интеграција на Македонија, патуваат кон Брисел, како дел од нејзините обврски од Договорот за решавање на спорот за името.
Шефот на грчката дипломатија Никос Коѕијас, смета дека за да има напредок „потребен е позитивен договор на Советот за општи работи, а таму постојат тешкотии“, бидејќи, како што рече, има земји што се спротивставуваат во овој момент да се даде датум за почеток на пристапни преговори со ЕУ.
– Нема да биде добро да се случи такво нешто, коментираше шефот на грчката дипломатија.
Недобивањето датум за пристапни преговори со ЕУ, би предизвикало разочарување, но и последици врз имплементацијата на Договорот и врз исходот од референдумот, смета и вицепремиерот за евроинтеграции Бујар Османи.
Во интервју за грчкиот весник „Realnews“, Османи вели дека доколку на претстојниот Самит на ЕУ не се донесе одлука за почеток на пристапни преговори ќе се разочараат сите што учествуваа во процесот и од двете страни, но, „уште поважно е разочарувањето што ќе се создаде кај политичките сили кои позитивно го третираа договорот и во двете земји“.
– Сигурно ќе биде огромно уназадување во врска со дополнителното имплементирање на договорот, ставајќи го во опасност исходот од референдумот и дополнително ќе ја ризикува поддршката за предвидените уставни промени итн. Нашата земја е важен партнер за ЕУ во областите како што се безбедноста, управувањето со мигрантската криза и справување со терористичките закани, а задоцнувањето на европската перспектива може да предизвика едно огромно назадување и во овие области, вели Османи.
Холандија попушти, САД ја притиска Франција
Во меѓувреме, и Холандскиот Парламент одлучи да даде зелено светло Македонија да почне преговори со Европската унија. Вчера американскиот државен секретар Мајк Помпео телефонски разговарал со францускиот министер за надворешни работи Ле Дријан, соопшти Стејт Департментот.
Во соопштението на Стејт Департментот пишува дека шефот на американската дипломатија Помпео побарал од неговиот француски колега Ле Дријан, Франција да даде поддршка за НАТО да упати покана за членство на Македонија и исто така да даде поддршка за отворање на пристапните преговори со Европската Унија, откако се потпиша договорот за името помеѓу Грција и Македонија.
Советот на ЕУ за општи работи на 25 и 26 јуни ќе разгледува почеток на пристапни преговори на Албанија и на Македонија, а во четврток и петок е состанокот на шефови на држави и влади на членките на Унијата.
Премиерот Зоран Заев и владина делегација, неделава заминува во посета на неколку европски држави. Како што соопшти владината прес служба, на 26 јуни тој е во официјална посета на Австрија, а на 27 јуни ќе биде во работна посета на Полска.
Во Виена ќе има средба со канцеларот Себастијан Курц и со претставници на австрискиот Парламент и ќе се обрати на дебата на тема „Заедничка европска иднина за Југоисточна Европа – Примерот на Македонија“.
Во Варшава, премиерот Заев ќе има средба со полскиот премиер, Матеус Моравјецски.
Во интервју за српскиот весник Политика, Заев вели дека Преспанскиот договор им отворил пат на граѓаните на Македонија, за два дена да добијат датум за пристапни преговори со ЕУ и и овозможил на земјата на 12 јули да стане 30 лленка на НАТО.
Шекеринска им пиша на колегите од НАТО
Министерката за одбрана Радмила Шекеринска испрати писмо до министрите за одбрана на 29-те земји членки на НАТО, во кое од нив бара поддршка за Македонија на Самитот на Алијансата во јули да добие покана за членство во НАТО.
-Ви пишувам по постигнувањето на историскиот договор околу спорот за името со Грција. Оваа пречка за нашата евроатлантска интеграција е отстранета. Ја барам вашата поддршка за Македонија да добие покана за полноправно членство во НАТО на претстојниот Самит. Беше потребна храброст, лидерство и дипломатија за да се постигне оваа цел – од двете страни. Нашиот народ е обединет и недвосмислен во желбата да станеме дел од НАТО и ЕУ, со доследна поддршка од повеќе од 75 отсто од нашите граѓани, се вели во писмото.
Шекеринска им пишува дека со приемот на Македонија во НАТО ќе се консолидира демократијата во регионот, ќе се зајакне стабилноста и безбедноста во регионот и ќе биде поставен позитивен пример за Западниот Балкан.