Шкендија не успеа до три бода ниту во третиот настап во новата сезоната во македонската Прва фудбалска лига. Тетовци за првпат играа како домаќини, по гостувањата кај Академија Пандев и кај Силекс, но против Македонија Ѓ.П. попладнево одиграа само 1:1 како продолжение на резултатската и играчка криза што ги тресе од двомечот со Номе Калју во квалификациите за Лигата на шампиони.
Бразилецот Паду во 38. минута осигура водство за ѓорчепетровци под Шара што го анулира македонскиот репрезентативец Егзон Бејтула три минути подоцна. „Црвено-црните“ имаа прилики во второто полувреме за втор гол, но затаија во реализацијата, па резултатот од 41. минута остана и конечен на средбата.
Академија Пандев и Ренова се единствени без пораз по трите одиграни кола во прволигашката конкуренција. Струмичани се радуваа и во вториот настап на својот стадион „Младост“ на кој, по Шкендија (1:0), попладнево падна и Борец со 2:0. Капитенот Љупче Дориев во екстра времето на првиот дел погоди од пенал, за триумфот на „пандевци“ да го потврди Ѓорѓи Танушев во 50. минута.
Христијан Кировски беше двоен стрелец во победата на Струга Трим Лум на домашен терен над Силекс со 2:1. Поранешниот напаѓач на Македонија Ѓ.П., на Вардар, на Работнички и на Шкендија во домашната сцена реализира во 30. минута и во 66. минута, во меѓувреме за кратовци „стрелаше“ Дарко Гроздановски во 50. минута.
Најефикасниот меч во третата рунда го одиграа Шкупи и Ренова – 2:2. Двата гола за чаирчани ги постигна интернационалецот од БиХ, Марин Јурина во 42. минута и во 90. минута, двата, пак, за прволигашот од Џепчиште беа дело на Ремзи Селмани во 44. минута и во 82. минута.
Вардар во увертирата на фудбалскиот викенд во ПМФЛ славеше над Работнички со 2:0 со погодоците на Бојан Колевски во 56. минута и на Даниел Аврамовски во првата минута од судиското надополнување на средбата.
ПМФЛ, 3 коло
Шкендија – Македонија Ѓ.П. 1:1
Академија П. – Борец 2:0
Шкупи – Ренова 2:2
Струга Т.Л. – Силекс 2:1
Вардар – Работнички 2:0
Табела: Академија Пандев 7, Ренова 7, Струга Трим Лум 6, Македонија Ѓорче Петров 5, Шкупи 4, Вардар 4, Работнички 3, Силекс 3, Шкендија 1, Борец 1.
Идно коло: Работнички – Академија П., Ренова – Вардар, Струга Т.Л. – Шкупи, Силекс – Македонија Ѓ.П., Борец – Шкендија.