По 14-месечна пауза, техничките разговори меѓу Белград и Приштина ќе продолжат во Брисел на 26 февруари, објави денеска српскиот јавниот сервис РТС.
Планирано е разговорите во седиштето на ЕУ да траат два дена, а се претпоставува дека агендата може да биде слична на онаа во јануари, кога на дневен ред требаше да се разговара за примена на постигнатите договори за Заедницата на српски општини, слободата на движење, правосудството и енергетиката.
Состанокот во јануари тогаш беше откажан по информациите за убиството на лидерот на Граѓанската иницијатива „Слобода, демократија, правда“ (СДП), Оливер Ивановиќ, по што српската делегација предводена од директорот на владината Канцеларија за Косово и Метотија, Марко Ѓуриќ, во знак на протест се врати во Белград.
Последниот состанок во Брисел на техничко ниво се одржа кон крајот на ноември 2016 година.
Според Стратегијата за проширување на ЕУ со земјите од Западен Балкан, една од клучните барања за Србија е и нормализирањето на односите со Косово.