Свеста е реална и приземна и посакува реприза на изданието и исходот против Израел во Хаифа, потсвеста е одмазничка и посакува реванш за поразот во Скадар. За реализација на потсвеста ќе треба да одигра свеста како основен и главен услов, во спротивно е многу веројатно согорување. Фудбалската репрезентација на Македонија од 20,45 часот на стадионот „Младост“ во Струмица ќе биде домаќин на Албанија во осмиот настап во групата Г од квалификациите за Светското првенство во Русија во наредното лето.
Сè уште се свежи спомените од начинот на кој се загуби натпреварот на „Лоро Боричи“ минатата есен. Општ е впечатокот дека Божја сила тогаш спречи Македонија да остане без бод, а според некои и без трите во воведното коло од циклусот. Прекрасното и сончево претпладне и облачното попладне се претворија во големо вечерно невреме што резултираше со прекин на средбата во 76 минута при 1:1 во моменти на налети на составот на Игор Ангеловски по втор гол за победа.
Соседската фудбалска битка за мундијалот продолжи наредниот ден (7 септември) и во преостанатата шестина од натпреварот Албанците успеаја до триумф со голот на Балај во претпоследната минута. Надежите се дека овојпат ќе биде поинаку и временски и резултатски. Само е потребно фокусирање на сопствената игра и по можност повторување на онаа од „Сами Офер“ стадионот во саботата.
„Албанија е наш должник за оној несреќен пораз во Скадар. Посакуваме победа и се надевам дека ќе успееме да ја оствариме за реванш, но и продолжување на добрата игра со Израел и позитивната енегрија што ја имаме. Не е важно кој ќе погоди, важно е да славиме на крајот. Би бил среќен ако успеам да ја израдувам публиката со нов гол, но тимската цел во случајот е поголема и позначајна од индивидуалниот ефект“, вели Горан Пандев.
Албанија вооошто не е за потценување, но не е ниту непобедлива. Игрите и резултатите се под нивото од циклусот за ЕП 2016, на кормилото повеќе не е Луиџи ди Бјаси, креатор на најголемиот фудбалски успех на западниот сосед, на чие место е назначен неговиот сонародник и една од легендите на италијанскиот фудбал, Кристијан Панучи.
Покрај дуелот Македонија – Албанија, во нашата група вечерва ќе играат уште Италија – Израел во Реџо Емилија и Лихтенштајн – Шпанија во Вадуц.
Квалификации за СП 2018 – денеска играат
Група Д, 8 коло
Австрија – Грузија (20,45 ч.)
Република Ирска – Србија (20,45 ч.)
Молдавија – Велс (20,45 ч.)
Табела: Србија 15, Република Ирска 13, Велс 11, Австрија 8, Грузија 4, Молдавија 2.
Група Г, 8 коло
Македонија – Албанија (20,45 ч.)
Италија – Израел (20,45 ч.)
Лихтенштајн – Шпанија (20,45 ч.)
Табела: Шпанија 19, Италија 16, Албанија 12, Израел 9, Македонија 6, Лихтенштајн 0.
Група И, 8 коло
Исланд – Украина (20,45 ч.)
Косово – Финска (20,45 ч.)
Турција – Хрватска (20,45 ч.)
Табела: Хрватска 16, Украина 14, Исланд 13, Турција 11, Финска 4, Косово 1.