Кремљ денес негираше мешање на руската Влада во претседателските избори на САД во 2016 година а овие обвинувања се, според Москва, неосновани.
Американската правда обвини 13 Руси за мешање во американските избори. Оваа вест беше објавена во петокот и дојде од канцеларијата на специјалниот обвинител Роберт Милер. Според него, Русија организирала кампања со милиони долари за да го дестабилизира американскиот политички систем.
Заговорот имал за цел “мешање во политичкиот и изборен процес вклучително претседателските избори во 2016 година”, вели документот на американската правда.
Но, според обвинението, нема доказ дека изборниот тим на претседателот Трамп бил вовлечен во оваа операција. Според американската правда, нема ниту доказ дека руската операција влијаела на финалниот резултат на изборите.
Приватна агенција на близок до Путин
Обвинението тврди дека кампањата ја финансирал Евгениј Пригожин, близок до Путин, кој ја водел Агенцијата за истражување на интернет. Обвинетите, претставувајќи се како американски граѓани и креирајќи лажни профили на американски личности, управувале страници на социјалните медиуми и групи дизајнирани да привлечат публика од САД”, се вели во извештајот. Во извештајот се вели и дека именуваните во обвинението почнале со планови како да влијаат на изборите уште во 2014 година.
Накусо, оваа пропагандна операција е финансирана и менаџирана од руската Агенцијата за истражување на интернет а не директно од Кремљ.
Ова го потврдува Андреј Солдатов, автор на книгата “Црвениот интернет: борба помеѓу дигиталните диктатори на Русија и новите он-лајн револуционери”, во вчерашното издание на Фајненшл Тајмс:
“Сајбер-дезинформациските кампањи станаа тактика што ја користи Русија за мешање во странство со што ги намалува трошоците и ризиците од контроверзните операции во странство. Денес, сајбер-кампањите поддржани од Кремљ имаат неортодоксен синџир на команда преку не-државните актери – првенствено бизнисмени со лични врски во Кремљ”, тврди Солдатов.
И додава дека од една страна Русите со Западот склучуваат договори за ограничување на сајбер-војувањето а од друга руските хакери систематски ги напаѓаат западните веб-страници, особено во Европа.
Оваа руска пропаганда во текот на долги месеци интензивно ја критикувала кандидатката на Демократската партија Хилару Клинтон. Но, на истрагата и е тешко да утврди колку оваа операција влијаела на резултатот на изборите. Она што е јасно е дека руско мешање во изборите навистина имало и дека не се работи само за “лов на вештерки” како што Доналд Трамп тврдеше. Но за Трамп добрата вест е што, барем досега, истрагата не нашла директна врска помеѓу него и руската пропаганда.
Твитови наместо превенција
Но, овде станува збор за вистински обид од странска сила за дестабилизација на политичката сцена во САД па оттука многу аналитичари очекуваат Трамп да го осуди овој руски обид и да преземе чекори такво нешто да не се повтори во иднина а особено во ноември кога се одржуваат амриканските избори за членови на Конгресот.
Наместо тоа, Трамп ја забавува американската и светската јавност со твитови со напади врз истрагите на Милер и истрагите на конгресните комисии. Или вчерашниот твит во кој Трамп пишува дека Русите “умираат од смеење” бидејќи успеале да внесат поделба и неред во САД.
„Никогаш не реков дека Русија не се мешала во изборите. Реков дека можеби е Русија, можеби Кина, или друга држава и организација, или некој гениј, кој седи в кревет и се игра со својот компјутер. Измамата беше дека кампањата на Трамп била поврзана со Русија, што никогаш не билa“, напиша Трамп на Твитер.
Трамп го критикуваше неговиот советник за национална безбедност Х.Р. Мекмастер оти заборавил да каже дека „на резултатите од изборите во 2016 година не влијаеле Русите и дека единствената поврзаност е меѓу Русија и демократската кандидатка Хилари Клинтон, како и други демократи“.
Покрај руското мешање во изборите во САД, Милер истражува и дали на Трамп се обидувал да ја попречи истрагата.