Американскиот претседател Џо Бајден синоќа прогласи вонредна состојба во Кентаки, јавија американските медиуми. Според последните информации, најмалку 70 лица го загубија животот во серијата од над 30 торнада што ја погодија оваа и уште четири други сојузни држави.
Бајден вчера нареди федералните ресурси да се насочат кон најпогодените локации, а претходно разговараше со гувернерите на Арканзас, на Илиноис, на Кентаки, на Мисури и на Тенеси за да изрази сочувство и да ја потврди посветеноста за брза испорака на помошта, соопшти Белата куќа, а пренесоа британските медиуми.
Во разорните бури што ги погодија американскиот Среден Запад и Југоисток, кои Бајден ги нарече „незамислива трагедија“, има повеќе мртви, а причинета е голема материјална штета.
Фабрика за свеќи, противпожарна станица во Кентаки, складиште на Амазон во државата Илиноис, каде што загинаа најмалку двајца работници, старечки дом во Мисури и многу други објекти и куќи се оштетени, наведуваат британските медиуми.
Гувернерот на Кентаки, Енди Башир, вчерашната прес-конференција изјави дека во оваа држава загинале најмалку 70 луѓе, а бројот на жртви можно е да биде и повеќе од стотина.
Ова е најразорното торнадо во историјата на нашата држава, рече тој, додавајќи дека 40 од 110 работници досега се извлечени од една фабрика.
Бешир прогласи вонредна состојба, ја активираше Националната гарда на Кентаки и ја распореди државната полиција.