По смртта на Афроамериканецот Џорџ Флојд, просторот пред Белата куќа во Вашингтон доби име „Black Lives Matter“ (Животот на црнците е важен). Градоначалничката на главниот град на САД, Мјуриел Баузер го објави тоа на Твитер.
На видеото што таа го постираше се гледа како вработен во градот на раскрсница на која се сечат 16. улица и Х-улицата става табла на која е напишано „Black Lives Matter“ (Животот на црнците е важен). Освен тоа, на 16. улица истото е напишано со огромни жолти букви, објави „Дојче Веле“.
Владата на Доналд Трамп во понеделникот вечерта даде наредба за празнење на тој дел од градот од демонстранти. Истовремено, Трамп пред Белата куќа држеше говор во кој се закани со активирање на армијата поради протестите ширум земјата по смртта на Џорџ Флојд. Непосредно потоа Трамп со придружба замина во црква и таму со Библија в рака позираше пред камерите.
Шефот на кабинетот на Баузер, Џон Фалчикио на Твитер напиша: „Неделава имаше спор околу тоа чија е оваа улица. Градоначалничката Баузер сакаше да стави јасно до знаење дека е ова улица на градот Вашингтон“. Освен тоа, според Фалчикио, градоначалничката сакала да „им оддаде почит на демонстрантите кои во понеделникот протестираа мирно“.
Градоначалничката на Вашингтон од американскиот претседател Трамп денеска побара и повлекување на војската и останатите безбедносни сили на неговата влада од улиците на главниот град. Во писмо до Трамп таа вели дека ја укинала вонредната состојба воведена поради протестите по смртта на Флојд. Протестите во Вашингтон во меѓувреме минаа мирно. Баузер, како што нагласува, е загрижена дека сојузните безбедносни сили на улиците на Вашингтон претставуваат ризик и дека поради тоа би можело да избувнат нови протести.
