Македонската фудбалска репрезентација се собра во Скопје и вечерва го одржи првиот тренинг за дуелите со Лихтенштајн во Скопје (13 октомври) и со Ерменија во Ереван (16 октомври) во рамки на Лигата на нации на УЕФА. Во работата на комплексот „Петар Милошевски“ при Фудбалската федерација на Македонија (ФФМ) го немаше само Стефан Ристовски кој синоќа имаше меч со Спортинг Лисабон како и Иван Тричковски кој отпадна од комбинација за претстојните обврски кон националниот тим поради повреда. Приклучувањето на офанзивниот бек на португалскиот лигаш е најавено во текот на утрешниот ден за комплетирање на селекцијата.
„Еве нè повторно на собир во Скопје. Пред нас се нови два меча во Лигата на нации што би рекол дека се клучни за конечниот изглед во групата. Но, одиме по ред. Прво Лихтенштајн, а потоа Ерменија. Желбите и целите се јасни. Да продолжиме со победничката низа и по можност без примен гол. Со евентуални три бода во сабота ќе осигураме самодоверба плус поред гостувањето во Ереван и во голема мера ќе префрлиме притисок врз Ерменците. Тоа воедно ќе значи и дека ќе бидеме многу блиску до првото место во групата што е наша основна амбиција во оваа фаза од натпреварувањето“, истакна голманот Столе Димитриевски кој од неодамна е позајмен од Гимнастик Тарагона во Рајо Валјекано.
Репрезентацијата на Македонија до четврток ќе тренира на комплексот при ФФМ (според агендата на селекторот Игор Ангеловски секој ден од 11 часот). На арената „Филип Втори“ ќе работи во петок, исто така претпладне, од 11 часот. Мечот со Лихтенштајн е во сабота на 13 октомври од 20.45 часот, денот во кој пред 25 години националниот тим ја имаше премиерата на меѓународната сцена со пријателскиот дуел против Словенија во Крањ што резултираше со триумф со 4:1. Веќе во недела репрезентација ќе тргне на пат кон Ереван на реванш со Ерменија во рамки на четвртото коло во Лигата на нации.
Македонија е лидер во четвртата група од Д лигата на нации со максимален ефект по воведните две кола. На стартот беше совладан Гибралтар на гости со 2:0, а потоа со идентичен резултат и Ерменија во Скопје.