Македонската кадетска ракометна репрезентација одигра нов натпревар во грч, но што е поважно победи и што е најважно се проби во осминафинале на Светското првенство за играчи до 19 години во Скопје. Во натпревар од третото коло во групата Ц совладан е Бахреин со 27:25 (полувреме: 12:9) по кој селекторот Данило Брестовац истакна дека е присутен напредок меѓутоа, истовремено, нагласи дека тимот што го предводи е далеку од максимум на капацитетот.
„Изгледавме подобро во двата правца за разлика од мечевите со Аргентина и со Нигерија. За нијанса се подобривме. Имаме уште два меча што треба да ги искористиме за достигнување на уште повисоко ниво на игра за осминафинале во кое нема поправен и во 60 минути може секој секого да победи. Уверувам дека ова досега не е наш максимум. Ги познавам овие момчиња“, е ставот на Брестовац што го искажа по средбата.
Серафимов со 10 гола беше најефикасен ракометар во македонската селекција за која Костески додаде 7. Најмногу голови, пак, во мечот реализира А. Али – 11.
Следува ден одмор за македонските кадети кои во недела (20.30 ч.) ќе играат против Данска, единствениот европски ривал во групата Ц до чиј крај потоа ќе преостане и пресметката со Јапонија.
СП во ракомет (У19) во машка конкуренција
Група А, 3 коло
Норвешка – Чиле 38:23
Шпанија – Словенија 24:21
Хрватска – Саудиска Арабија 36:17
Табела: Хрватска 6 бода, Шпанија 5, Словенија 4, Норвешка 3, Чиле 0, Саудиска Арабија 0.
Група Б, 3 коло
Франција – Унгарија 25:26
Шведска – Канада 38:16
Египет – Тајван 36:25
Табела: Унгарија 6 бода, Шведска 4, Франција 4, Египет 4, Тајван 0, Канада 0.
Група Ц, 3 коло
Бахреин – С. Македонија 25:27
Јапонија – Аргентина 29:26
Данска – Нигерија 35:22
Табела: Данска 6 бода, С. Македонија 4, Јапонија 4, Бахреин 2, Аргентина 2, Нигерија 0.
Група Д, 3 коло
Германија – Србија 30:22
Исланд – Португалија 24:28
Тунис – Бразил 26:25
Табела: Португалија 6 бода, Германија 4, Исланд 4, Србија 2, Тунис 2, Бразил 0.