Имаме теми од суштинско значење за дискусија и убеден сум дека сите сојузници ќе покажат единство за синте нив, бидејќи тоа е од клучно значење со оглед на менливата безбедносна состојба, изјави од Берлин МНР Бујар Османи, кој присуствува на неформалниот состанок на министрите за надворешни работи на земјите членки на НАТО.
Северна Македонија како најнова членка на НАТО силно ја поддржува полтиката на отворени врати, а со тоа и аспирацијата на Шведска и Финска за членство во НАТО, што претставува важен чекор за севкупната евроатлантска безбедност, истакна Османи.
Исто така, продолжи министерот, Западен Балкан ќе биде неизбежен дел од идната европска безбедносна архитектура и на тој начин политиката за отоврени врати на НАТО и проширувањето на ЕУ како „два главни столба на кои се потпира“ ќе бидат дел од новиот Стратешки концепт.
На маргините на состанокот Османи вчера имаше билатерални средби со министрите за надворешни работи на Украина, Дмитро Кулеба и на Црна Гора, Ранко Кривокапиќ.
– Европа и светот се соочени со исклучителни надворешно-политички и безбедносни предизвици од геополитички аспект и наједноставниот пат за демонстрирање на стратешкото лидерство на Европската Унија и нејзиниот кредибилитет е преку ефектуирање на одлуката за почетокот на пристапни преговори со Северна Македонија, заклучи Османи.
Како што соопшти МНР, на средбата стана збор и за актуелните состојби во Украина, при што министерот Османи и во оваа прилика најостро ја осуди воената инвазија на Русија врз Украина, особено бруталните убиства на цивили, нагласувајќи дека Северна Македонија, како членка на НАТО и кредибилен кандидат за членство во ЕУ има преземено низа чекори и мерки како одговор на руските воени дејствија.
На средбата со неговиот црногорски колега Ранко Кривокапиќ, Османи истакнал дека заокружувањето на взаемните стратешки цели на двете земји за членство во ЕУ, со војната во Украина добиваат важна, ако не пресудна, безбедносна и геополитичка димензија, истакнал Османи.