Вардар и Шкендија се поразени во првите контролни средби на подготовките во Анталија. Романска Стеауа беше подобра од шампионот на Македонија со 1:0. Единствениот гол на средбата го постигна интернационалецот од Хрватска, Антонио Јаколиш во 60 минута. Романците го погодија и дирекот во првото полувреме што, за среќа на Гачевски, ударот на капитенот Михаи Пинтили не заврши зад неговиот грб.
Габала, пак, го совлада вицепрвакот со 2:1. Азербејџанскиот тим поведе во 39 минута со голот на Хрватот Филип Озобиќ, а потврда на триумфот дојде во 77 минута преку Араз Абдулаев. Тетовци во 89 минута успеаја само да го ублажат поразот со погодокот на Јуре Чолак.
Вардар во вториот меч во Анталија ќе игра против руски Амкар Перм (28 јануари), Шкендија истиот ден договори натпревар со полска Термалика.